有人話，官員無能唔緊要，好大喜功最攞命。睇吓港產官僚，就知道呢句說話一啲都冇講錯。好似前朝曾蔭權爵士咁吖，將西九文化區吹到天花龍鳳，話要打造世界級文化中心喎，結果搞到唔湯唔水，嚴重超支不特止，而且隨時爛尾添，世界級文化中心就冇喇，世界級笑話就有。「東方報業民意調查」發現，大部分受訪者直斥貪曾好大喜功種下禍根，港府對基建工程缺乏監管，搞到失誤連連，遲早又要納稅人埋單。
即係咁，西九文化區前後講咗十幾年，依家十畫都未有一撇，就要面對嚴重超支及財困等問題，第三期工程嘅資金仍未有着落，包括多項核心文化及藝術設施隨時爛尾，都唔知點收科。試諗吓，如果西九文化區冇咗大劇院、音樂劇院、音樂中心等核心設施，點樣同西班牙嘅畢爾包、美國嘅古根漢、法國嘅龐比度相提並論呢？又點樣成為世界級文化中心呢？
「東方報業民意調查」顯示，對於西九當初預算不足以應付第三期核心工程，四成六受訪者認為落實無期，造價愈拖愈貴；兩成八人批評規劃草率；一成二人擔心爛尾收場添。
其實，港府一年前已經發出「預警」，指因為建築成本上升，加上高鐵工程延誤影響，西九項目原本獲批嘅二百幾億元撥款只夠支付首兩期工程，第三期工程冇米落鑊，要再檢討喎。點知檢討咗一年仍然未有下文，當局指若未能尋求另類融資方案，可能再向立法會申請額外撥款，即係要納稅人埋單咁解。市民又點睇呢？三成半人認為大型基建變成無底洞；兩成三人直指浪費公帑。另外，亦有唔少受訪者認為應該放棄興建，或者改變用途，減低建築成本。
冇錯嘞，官僚無能，造成一個個財政黑洞，次次都要市民埋單，佛都有火喇。最慘係西九工程已經洗濕個頭，如果由得佢爛尾，等於二百幾億元公帑付諸流水，你話係咪冤枉吖。
講開又講，港產官僚志大才疏，規劃不周，監管不力，加上無良政客添煩添亂，阻頭阻勢，大型基建工程延誤超支已經成為家常便飯。尤其係當年貪曾為打造政績，同時推出十大基建，造成人力物力緊張，更加令成本急增，結果十大基建淪為「十大醜聞」、「十大恥辱」。上述民調發現，對於十大基建幾乎全部超支及延誤，三成八受訪者認為當局欠策略，太多工程同時動工；三成三人狠批貪曾貪功遺禍。所以話，港府大事做唔到，小事做唔好，一味添煩添亂，簡直累人累物！