政情：公民講場：高鐵未平 鉛爆又起

運輸及房屋局局長張炳良唔知係咪流年諸事不順，佢負責嘅運輸及房屋兩個政策範疇都接連爆鑊。當佢仲諗緊點樣解決廣深港高鐵超支二百幾億元一事，隨時被立法會質到頭暈，點知日前又爆另一單公屋食水含鉛超標，由開始時只係喺啟德啟晴邨發現，仲可能延伸到其他四個屋邨，都唔知點收科。今次事件涉及食水安全，萬一有居民中鉛毒搞出人命，爆起嚟分分鐘仲勁過高鐵超支，到時真係多多錢都救唔番，睇嚟張炳良真係要諗計「止血」，否則未為高鐵問責前，先要為鉛水問責落台。