中環出更：E Q出新書 楊偉雄撐場
創新及科技局仲未成立，但係盛傳將會做局長嘅特首創新及科技諮詢委員會顧問楊偉雄，就密密落區出席活動，尋日就去咗熟悉資訊科技嘅立法會議員葛珮帆（EQ）新書發布會，仲同在場嘉賓有傾有講，認真識撈。
楊愛打波減肚腩
大家可能對楊偉雄唔太熟悉，佢透露自己最鍾意打網球，仲會請教練陪打，每個禮拜都會打一至兩次，持之以恆，話咁樣先會冇咗個肚腩，事關肚腩係男人最忌喎！
不過，同場嘅前海管理局香港事務首席聯絡官洪為民減肥就唔係咁成功喇，佢話之前好辛苦由最高二百零六磅減到一百九十八磅，但同個仔去完日本京板神一個星期，就升返上二百零三磅，因為應酬太多喎。發布會仲有多位政界人士出席，包括食物及衞生局副局長陳肇始、立法會主席曾鈺成、沙田區議員楊文銳，雖然鄉事派同民建聯唔啱傾，但沙田鄉事委員會主席莫錦貴都有出席。
卓妮