中環出更：馮煒光沙灘有美相伴
話說一直單身嘅新聞統籌專員馮煒光，自今年初透露成功結識女朋友後，至今始終仍未有帶女友出席公開場合，非常神秘。不過，尋日讀者報料，話早上八時至九時在深水灣見到馮煒光帶同女伴和一名小朋友到沙灘暢泳兼曬太陽。照片所見，馮煒光嘅女伴戴上墨鏡、身穿火辣嘅三點式泳衣，身材一覽無遺。馮煒光其後承認，火辣女伴係佢嘅女朋友。
冇落水 做「湊仔公」
據讀者沙灘現場直擊，馮煒光今次算係「跟得男伴」，因為佢去到沙灘根本冇落水，只係坐在沙灘蓆上看平板電腦；而女友和同行小朋友就相當雀躍，行出行入，當女友單獨暢泳時，佢就擔當「湊仔公」負責照顧小朋友。外人眼裏，唔清楚還以為佢哋係一家三口享受天倫之樂。不過，馮指該名小朋友是女友嘅姪兒。
其後他在社交網站facebook，上載一張小朋友嘅游水照片，自稱做「兼職湊仔公」，下午佢出席立法會議員葛珮帆的新書發布會時，亦抱起葛珮帆助理嘅年幼兒子，表現得非常雀躍，父愛爆發。不過，佢透露不打算生育，笑笑口稱「湊人哋個細路好玩好多」喎！
女友圈外人 想低調
至於神秘女友係咩身份，馮煒光就話女友係圈外人，想低調啲喎。不過，佢透露女友識揸電單車，幾年前相識嗰陣試過坐女友車尾，強調當時應該係搭實女友膊頭，唔係攬住條腰嗰隻，但男人坐女人車尾就遇到奇異目光，反而到依家就係佢揸七人車，女友做乘客多啲。
卓妮