香港都市陷阱處處，唔係冧樹就係冧招牌，簡直一步一驚心，但如果以為足不出戶就可以安枕無憂，咁就大錯特錯嘞，事關家陣連食水安全都靠唔住，問你怕未！
唔係靠嚇，有政黨前排抽查九龍西十三個屋邨嘅水樣本含鉛量，結果發現啟晴邨六座大廈裏面，有三座超出世衞每公升不多於十微克嘅標準，部分更超標二點八倍。房署最初死撐話冇問題，後來至死死氣承認有兩個水喉駁位發現含鉛燒焊物，至少四個樣本超過世衞標準喎。其實，點止啟晴邨食水出事吖，有立法會議員踢爆，涉事供應商負責全港十二個屋邨嘅水喉工程，遍及屯門、沙田、天水圍同石硤尾等地區，都咪話唔得人驚。
對於食水含鉛超標，房屋署急急補鑊，宣布優先為有六歲以下小童及孕婦嘅家庭更換水喉部件，並且喺工程完成前另外提供飲用食水。可惜吖，房署做到唔湯唔水，既冇交代點解水管接駁位含鉛燒焊物，亦冇具體換喉時間表，搞到居民人心惶惶，被迫改飲樽裝水。不可不知，人體內大量積聚鉛，可導致貧血、高血壓甚至令腦部同腎臟受損，唔係講玩。人命關天，唔該房署拿拿臨查清查楚，千祈唔好再敷衍了事吖。
正所謂，衰開有條路。公屋食水危機一浪接一浪，除咗啟晴邨出事，多個屋邨居民亦投訴水龍頭發現鎳及錳等致癌物質；而馬鞍山頌安邨就懷疑加壓泵故障，加上清洗不力，搞到食水變黃。最諷刺嘅係，頌安邨曾獲優質食水嘉許，你話係咪好笑吖。
即係咁，一次就話意外啫，接二連三爆發食水問題，如果話同管理無關，三歲細路都唔信喇。房署自己都承認，本來預計上個財政年度出租公屋虧蝕六億元，點知埋單計數只係蝕六十萬元，原因係薪酬、維修等方面開支較預期低喎。你話嘞，為咗慳皮將貨就價，點可能唔出事吖。
咪話功夫茶唔提醒，房署官僚胡混度日，敷衍塞責，後果可大可小，絕對唔係爆發食水問題咁簡單。呢，多年前爆發居屋短樁醜聞，咪就係因為承建商偷工減料，加上房署監管不力造成嘅囉。你知啦，家陣公營房屋落成量嚴重滯後，當局為咗追數，除咗公屋愈起愈細，點知會唔會有人因為趕進度而犧牲質素。
都係古人講得啱︰禍福無門，惟人自招。家陣香港七國咁亂，永無寧日，港產官僚繼續渾渾噩噩，得過且過，亂象必定陸續有來，今日食水有問題，下次又有咩醜聞呢？