ＣＹ出席今個立法年度最後一次答問大會，議事堂上建制派議員與激進泛民互罵場面醜態百出，功夫茶話「議事堂上多垃圾」，旨哉斯言，垃圾「議政」，難怪整個立法會臭氣熏天！垃圾「議政」，香港明天又怎不風雨飄搖？
曾鈺成早前因建制派群組通訊內容被公開，自認「人蠢無藥醫」，之不過佢面對一班水平低下嘅建制派議員，又面對一班劣幣和偽鈔嘅所謂「民主」鬥士，有乜辦法唔被激到生蝦咁跳，大動肝火？咁又係嘅，堂堂議事堂一啲咁多尊嚴規矩都冇，搞到七國咁亂，嘈過市集，面對一堆頑劣嘅垃圾，只能聲嘶力竭呼喝佢哋立刻離開會議廳！老朽睇見都戥佢辛苦！人蠢啫，難道就要受呢啲折磨？
講真，建制派議員，有幾個水平之低下，咁嘅識見，膽敢出來做代議士，除了自取其辱，自暴其醜，更是對自己人格嘅謀殺！曾主席「人蠢」啫，畢竟仲有點火，不禁怒斥：大家喺電視機前仲表演唔夠咩？
「人蠢無藥醫」嘅曾主席扯火有理！成班議員，既然沒有一個有蘇東坡讚美嘅「匹夫而為百世師，一言而為天下法」嘅議士，而好些建制派冇料卻不能如《國語》所記載的范獻子懂得反省。范獻子出使魯國，沒有做好事前準備，被魯人問到口啞啞，出洋相丟了架，然他懂得反思：如果將人比作樹木，知識便是樹的枝葉；沒有枝葉的樹木不僅難看，活也活不了啊！有根又如何？
老朽奉勸那些只能充當偽幣、劣幣嘅議員，好心坐定定少點開口，否則一開口咬着脷就唔好喇！
曾主席如果人唔蠢，恐怕不是扯火發怒，而係應該學《三國演義》裏面嗰位有辯才嘅禰衡──滿朝文武，坐而辱之，禰衡大哭起來，理由是你們都是死人，我焉能不哭？悵望千秋，念香港呢個「福地」，老朽只能一灑同情之淚！