民建聯（民記）上屆派出「新人」蔣麗芸（Ann）出選立法會九龍西議席，仲一舉成為該區票后。今年底又到區議會選舉，雖然民記有一百三十二個區議員，但有民記中人話，該黨或有九龍城區議員考慮退休，一旦真係退下火線，為咗保住議席隨時要阿Ann親自出征喎。阿Ann呢幾日頻頻落啟晴邨「抽水」檢驗含鉛量，莫非佢兩手準備出戰啟晴邨所屬嘅九龍城啟德北新選區？
講起阿Ann，相信大家有留意佢前日同人民力量議員陳偉業（大舊）喺立法會特首答問會上嘅罵戰，大舊因為搬埋阿Ann父親蔣震出嚟講，搞到阿Ann大怒離開議事廳，仲反鬧大舊：「你估我唔知你老婆同個女做咩呀？」
阿Ann尋日話朝早食早餐時，鄭重警告大舊日後講咩無所謂，唔好搬屋企人出嚟講。至於係咪知道大舊妻女做乜，阿Ann就故作神秘話「有必要先講」喎。不過，大舊就重申前日言論並無侮辱性，意思指蔣震係愛國商人，反問阿Ann點解講佢妻女，要求佢澄清。大舊之後又自爆父親係喺國民黨黃埔軍校畢業，兩個舅父都係國民黨員喎。