政情：拉布燒身 溫和泛民急逃生

白鴿揚言缺席財會

白鴿黨議員單仲偕話，佢哋會正常審議民生相關項目，但係因為不滿政府暴力加會，會喺財委會審議創科局時唔會出席會議，又話如果參與「拉布」就會落入政治鬥爭陷阱。不過，有學者就批評該黨唔開會，係迴避議員嘅議事責任。咁又係，唔開會做咩議員呢？等同白逗納稅人金錢。同樣講明唔會參與「拉布」嘅工黨就正常啲，話會如常出席會議質詢政府，只係最後會投反對票。

不過，公文袋嘅講法算係眾多政黨之中最模棱兩可，該黨話要等創新及科技諮詢委員會主席楊偉雄就下周會否出席會議回覆立法會才再作決定。至於會計界議員梁繼昌就一早講定，因為唔支持「拉布」，所以準備連會都唔開，並於下周離港，同十六歲囡囡去南歐四國旅行。

四子做騷 長毛廢問

失去溫和泛民相助，「拉布」四子尋日仍然喺財委會發動「拉布」，佢哋不停發問、提出休會待續動議等方式拖慢會議進度。社民連梁國雄（長毛）啲問題最無厘頭。佢喺審議沙田濾水廠原地重置工程時，就問「沙田有冇太陽，點解唔用太陽能」，好明顯係求其搵嘢問，毫無建設性。

人民力量早前要求將二十項工務工程分拆成十一項討論及表決，尋日六小時嘅財委會會議成功通過未被分拆嘅其中九項工程，以及包括西九文化區綜合地庫同沙田濾水廠重置工程等五項工程撥款。至於公務員薪酬水平調查加薪建議、本年度公務員加薪方案、設立回收基金等多項民生撥款項目仍然係未通過。如果泛民仍然縱容「拉布」四子阻礙撥款，甚至口講唔「拉布」，但實際幫口不停提問，票債票償相信係泛民宿命。