中環出更：斌女升學 阿爸鍾情英國
立法會紡織及製衣界議員鍾國斌（Felix）早年喺英國畢業後回流香港，可能因此對英國特別有情意結，連寶貝女讀書揀大學都要放棄一貫嘅積極不干預政策，花咗成年終於說服個女放棄赴美修讀電影，轉軚去英國讀媒體及傳播，九月仲會親自陪阿女去英國開學添，認真廿四孝爸爸。
美治安差 「冇乜好感」
立法會就快休會，唔少議員都一早計劃陪屋企人遊埠放暑假，Felix就忙住湊女開學，但原來過程一波三折。佢透露女兒對荷里活電影情有獨鍾，一直都想赴美讀電影做導演，但Felix自言向來對「美帝勢力」冇乜好感，感覺當地治安比較差，槍擊案又多，又擔心女兒去美國會成日掛住開派對學壞，好彩阿女轉軚「投靠」英國，仲同時獲兩間大學取錄添。
Felix笑言，其實阿女嘅國際預科文憑（IB）成績夠入牛津大學有餘，可惜阿女偏偏冇興趣，連申請入學都唔肯，錯失機會。不過，Felix明白女大女世界，亦唔期望女兒畢業後會接手佢嘅製衣生意。咁盤生意咪後繼無人？「咁咪由得佢摺囉！」Felix答得好豁達。
卓妮