中環出更：讓座從心 名人反對公審
近期喺社交網絡上不時有網民上載影片，批評公共交通公具上嘅乘客無讓座畀有需要人士，引來網民熱烈討論及公審。積極推動社會服務嘅願景基金會日前舉行成立五周年暨就職典禮晚宴，冧莊主席嘅「清潔王子」甄韋喬（Mickey）就話覺得做善事或關心長者應該由心而發，用正面嘅方式感染身邊人效法，批評或公審只會帶來負能量，無濟於事。
Mickey話，佢哋早前舉辦咗個「十面埋『服』」嘅社會創新服務大獎，希望鼓勵年輕人多花心思，運用技能及專業知識，去幫助有需要嘅人。
以身作則取代網絡批判
講起現時社交網絡上不時有網民放影片公審喺交通工具上唔讓座嘅人，佢就話自己經常搭港鐵，但冇咩特別嘅話，就算有位佢都會企，反正車程唔太耐，可讓座有需要嘅人。
有兩個女嘅菁英會主席盧金榮亦相當支持該服務大獎。講到關心社會文化，佢話長輩係小朋友學習榜樣，有次佢乘搭電車由天后去銅鑼灣，期間有兩位長者上車，一位女士見到就二話不說立即讓座，身旁嘅小朋友見狀亦隨即效法，起身讓埋自己個位畀另一位長者坐，令佢明白關心長者或做善事都要以身作則，培育小朋友嘅關愛文化。
當晚捧場嘅仲有「洗樓王」創辦人王嘉源，講起網上出現俗稱「道德塔利班」嘅人將照片放上網公審他人，佢就坦言每個人都總會有做錯事或做得唔好嘅時候，冇人係永遠啱晒，例如拍攝者亦可以主動即場詢問有冇人可以讓座，比起過後放上網指摘來得有貢獻。
卓妮