大埔：屋邨圍欄曬被管理公司懶理
「個圍欄下面就係樓梯，萬一跌咗啲被落嚟整到人都算，最怕係跣親人，其實以前都見過連扶手都有曬被，搞到落樓梯連扶手都冇得扶！」王小姐不時到大埔廣福邨探望親友，近日行經廣福商場時發現平台通往停車場樓梯圍欄及扶手滿布晾曬衣物，不滿管理公司未作處理。
勸喻無效才清走
廣福邨物業服務辦事處發言人表示，商場平台屬房署管理，而平台通往停車場的樓梯連扶手則屬領匯管理。除領匯管轄的樓梯及扶手外，上址平台圍欄皆屬邨內指定晾曬區，已張貼「晾曬區」告示，若發現居民於非「晾曬區」晾曬，會即時勸喻，若勸喻無效會將衣物清走並按扣分制處理。
領匯發言人則稱，涉事位置不屬其管轄範圍。
不過，王小姐指未有於圍欄附近發現「晾曬區」告示，又認為房署應檢視上址是否適合作晾曬場，「成個平台咁大，房署可以整啲晾衣架畀人用，咁好過放喺圍欄，又冇咁乾淨而且仲可能會跌落去。」