諮詢復諮詢，研究又研究，係港府施政嘅最大特色。舊年台灣先後爆發坑渠油及潲水油風波，香港亦受到波及，搞到人人聞油色變，當時港府信誓旦旦要立法規管食用油，點知拖咗十個月，依家至話進行諮詢喎，仲有冇遲啲吖。
係咁嘅，港府就立法規管食用油及回收廢食油進行三個月公眾諮詢，無論係收集、廢置或進出口廢食油，統統要領牌，防止廢食油回流食物鏈；同時規定本地生產或出口嘅食用油脂，包括橄欖油、花生油等植物油，以及動物脂肪，不得使用廢食油或劣質油脂作為生產原料，並要求食用油脂必須附有認證，但牛油等就不受規管。
老實講吖，近年食油問題多多，亂象叢生，直情好似無王管咁，當局依家至建議立法，已經慢咗幾拍，何況仲要慢慢諮詢，拖得嚟蚊都瞓蛇都死喇。就以舊年台灣坑渠油及潲水油風波嚟講吖，香港唔止係受害者，而且係劣質油基地，不法商人每年將逾千噸工業用豬油當食用豬油賣去台灣，經過加工後部分又回流香港，數以百計食肆中招，呢種情況最少已存在十三年，唔知幾多劣質油被港人食落肚，而港府居然一無所知，你話係咪反應遲鈍吖。
好明顯，本港喺規管食油方面存在重大漏洞，立法刻不容緩，可惜市民急港府唔急，諮詢復諮詢，隨時拖多一兩年至可以完成立法。功夫茶諗極都唔明，既然當局知道劣質油氾濫成災，嚴重威脅市民健康，點解唔當機立斷即時立法，而要拖拖拉拉呢？究竟係按既定程序諮詢重要，定係保障市民健康重要？
冇計喇，港產官僚唔止後知後覺，而且墨守成規，完全唔識靈活變通，唔怪得食物安全防線頻頻失守。呢，無論係孔雀石綠淡水魚及蘇丹紅禽蛋，或者係三聚氰胺奶製品及塑化劑風波，港府次次都係反應遲鈍，賊過興兵。最好笑嘅係，年前內地連鎖快餐店爆發過期肉醜聞，港產官僚啱啱仲實牙實齒話本港冇進口相關問題食品，點知話口未完就被踢爆講大話，搞到醜態百出。
所以話，信佢一成，雙目失明。今時今日食物安全問題多多，大陸方面靠唔住，台灣方面亦唔好得去邊，香港夾喺中間，冇啖好食。偏偏港府把關不力，事前防範固然一塌糊塗，事後補救亦姍姍來遲，連立法規管都慢條斯理，唔出事至奇吖。
講到底，民以食為天，食以安為先。食物安全事關重大，就算當局點樣嚴格把關，市民都唔會有意見；相反，如果港產官僚繼續懶懶閒，等到爆大鑊至補救，咁就後悔莫及喇！