政情：公民講場：劣質油無標準 市民食不安心

台灣去年坑渠油風波一發不可收拾，連香港都疑受影響不能幸免。港府尋日終於就立法規管食用油脂及回收「廢置食用油」諮詢公眾。不過，咪以為有監管框架就一勞永逸，食物及衞生局局長高永文話，坊間所指嘅地溝油、黑心油及劣質油均係籠統稱謂，難有科學定義，國際上亦都無統一檢測標準，只係可以檢測食用油中有否有害物質。其實市民想要嘅嘢好簡單，當局最緊要保證食用油安全，高永文真係醒醒定定「把關」至好。