政情：合和倡船街「鬼屋」變證婚場

位於灣仔船街嘅南固臺除咗係一級歷史建築，仲被喻為香港猛鬼勝地之一。合和實業早年收購後亦承諾保育呢幢百年歷史建築，最近敲定保育方案。合和實業董事總經理胡文新（Thomas）尋日以南固臺大業主身份出席灣仔區議會會議，居然建議將呢幢鬧鬼勝地改建為證婚場所，真係夠晒「驚喜」。

除咗南固臺，合和近年亦收購附近妙鏡台嘅全部業權，所以提出將南固臺連同毗鄰地皮合作發展，包括將南固臺活化成證婚場所。不過，會上有區議員直指南固臺出名猛鬼，加上近年後生仔結婚意欲下降，擔心呢個咁「猛」嘅證婚場地冇生意；有議員更加反建議合和將錯就錯，將南固臺活化為鬼屋咪仲吸引！

有備而來嘅Thomas就話，聽過唔少有關南固臺嘅古仔，會了解呢啲「猛古」嘅出處，但相信部分鬼古只係誤傳，合和下年會成立小組，就呢個地段嘅保育計劃及項目發展再請教專業人士意見。

Thomas仲話，香港每年平均有四、五萬對新人結婚，唔擔心生意問題。不過，南固臺猛鬼形象咁深入民心，相信新人結婚都未必想有「第三者」觀禮喇！