政情：律師「夢」醒 轉行學做社企
做咗十五年律師嘅一笑慈善基金副主席黃夢瑩（Monin），近日放棄做律師，去英國著名學府牛津大學攻讀社會企業碩士課程。為上堂，Monin每隔兩星期飛倫敦一次，下決心用人生餘下時間，一心一意做社企專家。
想開免費課程助青年創業
搭咁多次長途飛機都咪話唔攰，但牛津猛人雲集，Monin形容係一間「腦袋銀行」（Brain Bank）一樣，每次上堂，都有取之不盡嘅靈感。
返學八個月，Monin已構思用社企概念開咖啡店，旨在吸納有志創業嘅年輕人，由佢哋提供免費六個月課程，學習營運咖啡店之道。學成後，會協助佢哋喺商場開流動咖啡車或發展速遞咖啡生意等，聽落幾有創意。Monin話，若然呢條橋行得通，歡迎大家抄橋喎。
社企文化近年喺歐洲大放異彩，英國有唔少成功案例。Monin總結話，社企要營運成功，必需不斷提升競爭力，不可單靠社會同情，所以佢正研究一條適合香港發展嘅路，全心全意走下去。