二○一一年區議會選舉爆出連串種票事件之後，選舉事務處就提出多項政策補鑊，包括抽查一百六十萬名選民登記地址，並要求被抽查嘅選民喺七月中前回覆選舉事務處嘅核實信件，仲話如果選民兩星期內都無回覆，好大機會被取消選民資格。不論泛民或建制政黨都對於新政策叫苦連天，大呻選舉事務處篩走佢哋部分潛在選民，分分鐘連參選機會都無埋，真係咁嚴重？
原來政黨唔單止怕選民被篩走，更怕有旗下議員嘅選民資格被取消，皆因法例規定區議會候選人一定要係合資格選民，如果一不留神被取消選民資格，無得投票事少，損失議席事大！
所以，近日就有政黨下令旗下區議員上網檢查自已個名仲喺唔喺選民登記名單上，避免忘記更新地址，或各種原因被取消選民資格。不過，如果區議員連自己有無更新地址都唔知道，烏龍成咁，選民仲點會有信心畀佢哋幫手處理區內事務呢？