政情：同性婚姻 抑人口佳策
日前美國聯邦最高法院裁定全國同性婚姻合法化，令同性婚姻議題又再炒熱。雖然香港連係咪就反性傾向歧視立法都未有共識，但呢個消息一出，唔少具宗教背景嘅社會人士及宗教團體已表明對此有保留，認為會影響婚姻制度同家庭倫理核心價值。不過，孔教學院院長湯恩佳似乎對同性婚姻持開放態度，覺得同性戀自古以來都有，又唔會影響婚姻制度同社會經濟，仲可以抑制日漸膨脹嘅人口添！
稱無損社會經濟
湯恩佳日前出席一個酒會，言談之間講到美國已經宣布全國同性婚姻合法化。被問到對同性婚姻有咩睇法時，佢就話覺得呢樣嘢冇咩所謂，同一面倒反對嘅宗教人士相比，可以話係相對開放。湯恩佳解釋，其實同性戀自古以來都存在，甚至有「斷袖分桃」、「龍陽之癖」嘅典故，既然同性戀喺社會上咁耐，世界都如常運行，所以就覺得即使係同性婚姻都冇咩所謂；況且同性戀多數係先天嘅時候已經形成，後天都無法勉強喎。
正如湯恩佳所講，同性戀一直都有，唔係新鮮事，但社會上就有唔少聲音質疑同性婚姻會對家庭同婚姻制度造成衝擊。湯恩佳就話，自己好多年前喺美國三藩市見過一啲大型同志遊行，雖然見到佢哋奇裝異服有啲「礙眼」，睇到兩個大男人攬攬錫錫都覺得唔係好自然，但就感覺佢哋嘅社群好和諧，唔覺得會對社會生產力、經濟、組織家庭，甚至婚姻制度有咩影響。
湯恩佳又話，其實依家全世界已經有七十幾億人口，人口膨脹嚴重，地球嘅資源根本無法應付大家嘅需要。倘若人口再係咁膨脹落去，可能大家都要學內地咁，實施限制生育。相反，同性戀者唔會生兒育女，所以容許佢哋結婚都未嘗唔係一件好事，事關可以幫助抑制人口增長喎。不過，中國傳統一直有傳宗接代嘅觀念，唔通佢覺得抑制人口增長比中國傳統思想觀念重要？