中環出更：葛珮帆否認用A貨Mon貼
建制派喺早前政改方案表決期間連環「甩轆」，除咗集體離場無投票外，手機WhatsApp群組對話內容仲外洩兼被傳媒影到，真係屋漏兼逢夜雨。不過，事後建制派並無改用其他手機通訊程式，反而選擇唔講重要嘢，斬腳趾避沙蟲。咪以為建制派議員個個對手機保安都咁求其，原來議員葛珮帆（EQ）一直有用開手機防偷窺螢幕保護貼，但點解佢仍然被人影到手機訊息內容呢？
「被人影到係角度問題」
EQ手機訊息內容被公開後，有朋友就笑佢係咪用咗平價A貨防偷窺螢幕保護貼喎！EQ就否認用A貨，但至於買咗幾多錢，佢就話唔記得喇，係其他人買畀佢嘅。佢強調，被人影到係角度問題啫，就算用幾貴嘅保護貼都總有個角度會睇到，惟有以後睇電話時小心啲。佢又話，雖然喺會議廳只會做議會相關嘅事，但係控制唔到朋友傳咩畀佢喎。經此一役，議員以後睇訊息會否用手遮住部手機呢？
卓妮