中環出更：子鋒波不絕 林亮撐孫從政
本地玩具工業老行尊林亮憑着經典玩具黃色「膠鴨仔」廣為人知。為咗延續膠鴨仔嘅傳奇，尋日佢宣布一系列為膠鴨仔開枝散葉嘅大計。身兼行政會議及立法會雙料議員嘅林亮長子林健鋒（Jeffrey）、次子林健勳及Jeffrey囝囝林凱章（Victor）齊齊撐場。近排Jeffrey仕途遇上唔少阻滯，唔知林亮會唔會鼓勵Victor從政？林亮笑笑口話，只要搵到接班人，唔介意孫仔入政壇喎！
Jeffrey近年仕途當黑，佢做主席嘅盛事基金頻頻爆醜聞；政改表決當日，Jeffrey又突然話要「等埋發叔」而引爆建制派離場冇投票嘅「甩轆」事件，令Jeffrey嘅政治前途蒙上陰霾。林亮盤生意依家主要係交畀林健勳同Victor打理，唔知佢會唔會發動第二梯隊，畀Victor競選議員躋身政界呢？
林亮就話，一向對待兒孫好民主，只要Victor幫手搵到接班人，就唔反對佢從政。不過Victor就話未有從政嘅打算，首要任務係做好家族生意，開發多啲大人細路都啱玩嘅玩具就真。
盼「高齡」黃膠鴨潮起來
講番林亮今次嘅大計，係希望令六十幾歲「高齡」嘅膠鴨仔追上潮流，成為細味香港情懷嘅品牌。所以佢重新賦予鴨仔角色及性格，包括有一母三子嘅家庭關係，而每個成員又各具個性，遲啲仲會為膠鴨仔搵番幾個朋友咁話；同時設計多種周邊產品，包括購物袋、T恤及文具，部分收入將捐畀慈善機構。
卓妮