俗語話，面係人哋畀，架係自己丟。國泰航空近排頻頻上頭條，唔係因為業績理想，亦唔係因為服務改善，而係因為醜聞爆燈。香港名牌淪為國際笑柄，搞到全球排名大跌，講起真係失禮。「東方報業民意調查」發現，受訪者普遍認為國泰管理出咗問題，競爭力今非昔比，如果再唔改進，遲早出事嘅咋。
講到國泰嘅醜聞，近日令乘客聞之色變嘅客機食水含菌量超標，都算經典咯。表面上污染源頭係地勤公司水車，但如果唔係國泰管理混亂，危機應變錯漏百出，甚至涉嫌刻意隱瞞，又點會搞到咁大鑊吖。食水受到污染，國泰居然拖足半個月至呈報，等於攞乘客健康較飛，你話係咪靠害吖！
市民又點睇呢？「東方報業民意調查」顯示，對於國泰客機食水含菌超標無交代，污染源頭未明照樣向乘客提供食水，四成三受訪者批評國泰罔顧乘客健康；三成三人要求盡快交代事件；一成七人直指衞生署責無旁貸。
除咗客機食水藏污納垢，國泰醜聞五花八門，更係鑊鑊新鮮鑊鑊甘。有乘客四日內三次遇上國泰延誤，有乘客買咗商務票被降級至經濟客位，烏龍百出，怨聲載道。日前又有一班國泰航機遇上機尾亂流導致強力搖晃，幾乎釀成空難，更加令人擔心飛行安全。
尤其係國泰頻頻發生勞資糾紛，年年爆發工潮，簡直令人不勝其煩。呢，早前國泰空服員工會就薪酬及福利問題發起工業行動，最後資方跪低而暫告一段落，以為雨過天青喇，點知又輪到國泰機師工會不滿編更安排，發起無限期按章工作。勞資惡鬥不停，乘客成為磨心，國泰想唔畀人唾棄都幾難。對於國泰屢爆工潮，四成半受訪者批評管理不善；兩成一人直指影響服務質素；兩成二人認為待遇差打擊士氣。所以話，市民眼睛係雪亮嘅。
講起真係唏噓，曾幾何時國泰以優質服務享譽國際，曾多次摘下全球最佳航空公司桂冠，成為港人引以為傲嘅品牌，點知近年服務質素每況愈下，連國際排名都保唔住，公司固然丟架，香港形象亦受到拖累。多數受訪者認為國泰全球最佳航空公司排名由榜首跌至第三位，原因係監管不力，管理混亂，加上營運模式過時，導致競爭力下跌。
正所謂，一損俱損，一榮俱榮。國泰管理不善，服務質素不斷走下坡，昔日港人嘅驕傲，今日變成港人嘅恥辱，正正係成個香港不斷沉淪嘅縮影。計功夫茶話齋，如果國泰繼續不思進取，莫講話失去全球最佳航空公司榮譽，遲早連本地乘客都保唔住嘅咋。