港府日前公布本財政年度第二季度賣地計劃，被外界質疑政府主動賣地只有三幅，其他土地供應主要靠港鐵物業發展項目「湊數」。發展局局長陳茂波（波叔）尋日寫網誌澄清，強調準備喺今季推出嘅西鐵元朗站項目，其實係屬政府擁有，推出時間完全由政府主導，同其他政府賣地分別不大，港鐵只係項目代理人。話說回來，高鐵香港段都係由政府擁有，港鐵只係負責高鐵工程嘅管理人，但最後都係搞到一鑊粥，令運輸及房屋局局長張炳良孭晒鑊。元朗站項目會唔會搞到好似高鐵工程咁，大家拭目以待喇！
