立法會快將休會，唔少議員趁機去旅行叉電。旅遊界議員姚思榮每年都會同家人去唔同地方旅行，今年因爸爸身體唔好，加上行動不便，所以暫未有旅行計劃。佢又話，啱啱同做咗兩年多嘅印傭續約，不過印傭返完鄉下就冇晒影，可能要搵親戚照顧住爸爸先。
姚思榮今年打算留港抖暑，但佢身為業界代表繼續鼓勵大家外遊，舉例指依家日圓匯價下跌，所以日本好抵玩；台灣就勝在同香港夠近，可以安排短程旅遊，啱晒精打細算嘅港人，而內地嘅絲綢之路亦好值得去望吓。
對於最近飽受新沙士疫情影響嘅南韓，姚思榮估計南韓之後會推出優惠，吸引旅客同谷番旺當地旅遊業。佢亦推介大家去歐洲旅行觀光同掃名牌貨。姚思榮幾乎將港人旅遊熱門去處都推介一番，睇嚟佢為推廣旅遊業真係去得好盡。