政情：成堆黑材料舉定白旗
立法會主席曾鈺成最近是非不斷，繼早前建制派WhatsApp群組訊息曝光，被揭於政改表決期間向建制派「通水」兼「教路」，近日又被踢爆三年前其辦公室一度被竊聽，最近又被揭於佔領行動期間發表涉及種族歧視言論。面對一波未平一波又起嘅爭議風波，曾鈺成尋日不惜自爆有大把黑材料，又講到明冇意參選特首、立法會選舉，日後將會退出政治舞台。其實曾鈺成言談間自行舉晒白旗，似乎係希望視佢為潛在對手嘅人士高抬貴手，唔使再白忙一場嘞！
願為涉歧視論道歉
最近接二連三有疑似針對曾鈺成嘅黑材料曝光，搞到曾鈺成要多次道歉平息事件。對於去年出席港大私人活動，曾引述醫生同學講要搵非洲人到佔領區嘅言論，曾鈺成尋日接受傳媒訪問時稱，本身係冇歧視嘅意圖，其實係言者無心，如有人感到被冒犯願意誠懇道歉，不過當時並冇人即場提出異議。佢又提及，當時活動係私人聚會，主持人已經講明唔好錄音，唔明點解會有錄音曝光，因此覺得奇怪同詫異。
對於有指有人刻意發放黑材料，曾鈺成對此唔認同，但同時笑言自己有很多黑材料，其後再連消帶打提到，如果未來一、兩年參與選舉，佢可能會較為着緊，之不過反正日後退出政治舞台，因此唔認為有人願意花時間收集佢嘅黑材料。當問及黑材料嘅具體內容，曾則指，邊會有人主動披露自己黑材料。
話唔選立會及特首
曾鈺成其後趁機再次表明心迹，自己冇意再參選立法會、亦唔會參選二○一七年特首選舉，而卸任立法會主席後，亦唔會出任港區人大代表或全國政協委員，未來只係想籌組智庫，研究五十年不變嘅承諾期滿後，香港「一國兩制」如何發展等，呼籲大家唔好一開始就掘定戰壕，定死自己嘅位置，咁就唔會再有溝通商量嘅空間，結果只會係一切維持現狀。
話時話，曾鈺成表明自己毫無戰意，更揚言完全退出政治舞台，只會專心搞智庫，之不過過去一段時間針對佢嘅疑似黑材料好似未停過，莫非曾鈺成自行舉晒白旗都唔夠，未來更加要清心寡欲，先可以避過政治風眼？