中環出更：白鴿黨富貴 豪裝總部又買樓
佔領行動後首場大戰係年底區議會選舉，不論建制、泛民政黨都準備大灑銀彈去做選舉工程，其中被視泛民龍頭嘅民主黨（白鴿黨）忽然富貴，豪擲七百萬買入荔枝角區一個千幾呎嘅工廈單位，兼豪花一百三十萬裝修太子總部，使錢一啲都唔手軟。白鴿黨於區選前夕大手筆裝修又置業，唔通白鴿黨又搵到「金主」或大水喉，唔使再為選舉銀彈發愁？
白鴿黨主席劉慧卿話，太子總部已經用咗廿多年，設施已經相當殘舊，該黨一直希望物色一個四千至五千呎嘅地方做新總部，不過樓價太貴，所以改為購入細單位，再裝修現有太子總部。至於今次大手筆裝修同置業錢從何來，該黨司庫袁海文解釋係儲備金。
學民搵廉租單位
另一方面，學民思潮召集人黃之鋒尋晚轉貼學民社交網站內容，指學民位於荔枝角嘅總部於今年九月租約期滿，收到業主來信要求加租，因此有意搵一千六百呎以上嘅「廉租單位」，地點位於觀塘線或荔枝角至尖沙咀港鐵沿線，「現請好心人推薦新單位」。據悉業主希望由月租二萬一千元，增加四千元至二萬五千元，有網友留言反建議，學民可搵剛購入新單位嘅白鴿黨協助，黃回覆稱，學民唔會接受政黨捐助。
卓妮