中環出更：顏明秀想考潛水牌護身
馬季煞科抖暑在即，卓妮尋日喺沙田馬場見到一批城中名人，佢哋都開始諗緊抖暑大計，最多人打算出外旅遊，其中中華廠商聯合會青委副主席顏明秀（Candy）話打算去菲律賓潛水，而且過去潛水曾有慘痛嘅經歷，更令佢想考番個潛水教練牌傍身。
有逾五年潛水經驗嘅Candy話，身邊嘅朋友都已經考晒潛水教練牌，佢自知細細粒嘅身形相比下輸蝕咗啲，而且喺水面做心外壓或救人時都需要好大體力，但佢依然想考教練牌。
面罩未戴妥 曾失聰三日
皆因Candy幾年前喺浮羅交怡首次參加潛水團，當地教練幫佢戴咗潛水面罩後，就拉咗佢落十米深水底，後來先發現個面罩原來未戴好，搞到事後要一對耳仔受罪超痛，前後三日聽唔到嘢。
Candy嘅媽媽顏吳餘英則計劃暑假同老公顏培英過一個郵輪假期，Candy表明唔會阻父母過二人世界，仲話上年已經同佢哋一齊坐咗四星期火車之旅，遊蒙古及俄羅斯等地。
廠商會另一青委副主席王詩雅就話，準備於兩星期後去澳洲探班好友，雖然估計當地天氣大概只有六至七度，但好多澳洲人唔理天氣幾凍都會去滑水，佢哋一班朋友放假最鍾意帶埋啲小朋友，買定幾袋零食去野餐，睇人滑水；至於廠商會青委岑寶寶則趁轉工空檔，打算留港抖吓。
同場仲有正積極考慮參與新界東補選嘅上水鄉事委員會主席侯志強，佢話明知參選嬴面唔係好大，只係心口掛個勇字去試票，最終會視乎鄉議局執委會嘅意願作最後決定。
卓妮