古人話，法存則國安，法亡則國危。真係講得一啲都無錯o架，香港今時今日搞到烏煙瘴氣，亂象叢生，其中一個禍源咪就係法治蕩然囉，港府有港府縱容，大學有大學放生，人人視法紀如無物，唔天下大亂就奇喇。
係咁嘅，佔中發起人兼香港大學法律學院副教授戴耀廷被踢爆多次以匿名方式向港大多個學院及機構a秘密捐款合共一百四十五萬元，用作推動佔中行動，港大校務委員會經過近半年反覆討論，終於通過接納及公開有關調查報告嘞，不過令人奇怪嘅係，雖然報告點名批評戴耀廷、法律學院前院長陳文敏、港大民意研究計劃總監鍾庭耀等人，喺處理有關捐款時偏離應有預期水平或未有履行應有責任，但未有建議任何處分，校委會最終只係暫停處理陳文敏升任港大學術人事及資源副校長，擺明大事化小，不了了之喇。
仲有冇荒謬啲吖，調查報告明明指出，戴耀廷等人處理捐款手法有問題，校方居然隻眼開隻眼閉，又唔處分，又唔譴責，連直斥違規都冇句，話唔係故意放生都冇人信喇。市民眼睛係雪亮嘅，戴耀廷爆出秘密捐款醜聞之後，被校方要求提供匿名捐款人資料，結果足足拖咗六個星期至交代神秘捐款人係另一佔中發起人朱耀明，小學生都知有蠱惑喇。係人都知，朱耀明只係一名牧師，何來咁多錢吖？就算有錢都捐畀教會喇，點解千唔揀、萬唔揀，偏偏揀中港大吖？畫公仔唔使畫出腸，啲錢究竟乜嘢來歷，用途係乜，目的係乜，大家心中有數。
紀綱一廢，何事不生。港大無視法紀，姑息養奸，任由學棍不務正業，鼓吹違法，誤人子弟，唔怪得校園烏煙瘴氣，更加唔怪得國際排名每況愈下咯。最諷刺嘅係，港大法律學院本來係捍衞法治嘅堡壘，家陣居然變成摧毀法治的淵藪，社會點會唔是非顛倒，七國咁亂吖。按照反對派嘅歪理名句，「不守法絕對不等於不尊重法治」，幾位醜聞主角逍遙法外，更加覺得自己係民主英雄、正義化身，話唔定又密謀搞風搞雨咯。
所以話啫，法之不行，自上犯之，香港淪落到法治蕩然嘅地步，唔係無道理o架。莫講港大包庇縱容，港府一樣放虎歸山，本來佔中搞手及幕後黑手早已一網成擒，點知當局呢頭拉人，嗰頭放人，拖到今日依然未提出檢控，違法者仲唔有恃無恐咩。呢，過去半年香港局勢愈來愈失控，唔止鳩嗚、光復、狙擊、帳篷陣等亂象禁之不絕，有人甚至狼到製造炸彈準備一鑊熟，呢啲咪就係當局有法不依、雙重標準嘅惡果囉。
咪話功夫茶唔提醒，政改雖然落幕，但牛鬼蛇神唔會輕易收手，旺角日前又爆流血衝突就係明證嘞。港府養虎遺患，遲早自食惡果嘅咋！