政情：房車撞柱 高球傷腳 區璟智禍不單行
外號「頭箍小姐」嘅財經事務及庫務局前常任秘書長區璟智去年十二月退休，點知退休之後仲忙過返工，除咗一星期去一次佢擔任會長嘅協青社處理文件之外，仲開始學打高爾夫球，有時更加要做「跟得夫人」陪丈夫周圍公幹。不過，幸福嘅退休生活原來都有啲小挫折。
座駕維修費有排計
原來區璟智早兩星期，一日之內整傷腳兼撞爛私家車。佢話當日打完高爾夫球，一唔小心屈親腳趾，本來以為無咩事，去東區醫院做例行檢查時，醫生話佢可能有骨折，要去急症室診治。點知禍不單行，當佢係急症室等緊醫生時，司機突然打電話畀佢，話佢架房車撞咗燈柱，區璟智唯有一拐一拐去視察「意外現場」，好在無撞傷任何人，但維修費真係有排計。
着住腳套照遊北京
雖然撞車又傷腳，但都無損區璟智心情，佢更加大讚東區醫院醫生服務周到，當日只係等咗四小時，又照Ｘ光，又整咗隻鞋一樣大嘅腳套保護腳趾，仲要只係收一百元，真係物超所值。唔好以為要着腳套就會令區璟智乖乖哋坐下來，佢竟然帶住腳套去北京旅行，唔通佢近得青年人多，感染埋佢哋「天不怕、地不怕」嘅精神？