政情：象哥獲妻提示 「開會專心啲」
立法會進出口界議員黃定光（象哥）早前喺辯論政改方案期間，被人影到用手機欣賞金髮美女嘅影片，片中嘅美女仲喺桌球枱上擺出多個性感甫士，非常誘人。象哥事後澄清話，該片係朋友傳來，唔係色情影片，純粹係教人打桌球嘅技巧，仲話太太即工聯會會長林淑儀唔介意添。我哋早幾日見到林淑儀，當然要問吓佢係咪咁「開通」啦，佢就話已經提醒象哥開會時唔好掛住玩手機，要專心啲開會喎。
暑假唔同老公去旅行
建制派WhatsApp訊息外洩亦搞到人心惶惶，林淑儀就話自己好少玩WhatsApp，同象哥都係簡單對話，如問象哥返唔返屋企食飯、會唔會開車經過接埋佢等。佢又話手機唔好裝好多通訊程式，一般只會用嚟打電話同記得開會時間，所以唔會咁易出事。暑假已到，好多人都會去旅行，林淑儀斬釘截鐵話唔會同象哥去旅行，唔通真係嬲象哥睇艷女？林解釋工會唔係學校，唔會放暑假，象哥放假唔等於佢放假。