政情：新婚馮英倫 恨做爸爸
發展局局長政治助理馮英倫（Allen）日前小登科，新郎哥工作至上，留待九月先飛美國Napa Valley度蜜月。不過講到「造人」，Allen明言好恨做爸爸，愈快愈好喎。新婚嘅Allen，沐浴在幸福之中，尋日出席一個酒會講起愛妻，嘴角甜絲絲。佢話屋企多咗個伴，並無「同住難」問題，事關兩人夾到痹，雖然馮太Carrie不善廚藝，無得玩「煮飯仔」，但Allen完全唔介意。
Allen又話，揀去Napa Valley度蜜月，係遷就做紅酒生意嘅Carrie順道參觀酒莊，又話姑姐都喺當地生活，應該好恨見到呢位馮家新成員喎。一對新人好鍾意小朋友，渴望盡快「造人」成功，Allen仲話，與佢年紀相若嘅兩位表哥已為人父，希望好快輪到佢。傳聞Allen讀書時甚得女同學歡心，愛慕者眾，如今告別王老五生涯，未知會否令一眾舊同學傷心？