政情：廣播處長夠鐘走人 部門無缺何處容忍
香港電台（港台）嘅角色一向都好尷尬，既係公共廣播機構，但又係政府部門。適逢港台總編輯、廣播處長鄧忍光（Roy）已經做咗接近四年，預料按規矩即將要調職，港府早前亦就處長職位作公開招聘。不過，有口痕友分析，其他處長級位置暫時未有空缺，創新及科技局又遲遲未成功開局，搞到政府依家都好頭痕點樣安置佢好！
身為政務官嘅Roy，早於二○一一年九月底上任廣播處長一職，至今都有三年零九個月，以政務官三至四年一調嘅慣例，預計佢即將調任。至於點解佢仲未調任？據聞有兩個原因，首要原因就係政府去年九月開始公開招聘廣播處長，但至今仲未公布人選，即係未有人接替Roy。
港台難消化兩條頻譜
另一個原因就係政府仲未諗好點調職，因為Roy依家係D6級（首長級第六級）政務官，同級職位就係部門處長，亦有可能佢係署任D8級嘅常任秘書長（常秘）。之但係最近一次調任康文署署長就無佢份，創科局亦「拉布」至今，仍未能開局空出常秘位，所以似乎都要等有處長或常秘退任，先有轉機。話口未完，近日有傳創新及科技署署長王榮珍今年提早退休，令Roy調職有番啲曙光。
不過，就算Roy離去，港台仍有一堆「蘇州屎」留低畀新處長執手尾，當中包括兩件大事。第一件係亞視不獲續牌，港台要「臨危受命」接手亞視兩條模擬頻譜，據聞港台已經畀咗商務及經濟發展局三個建議，分別係買入亞視現有器材及發射站、租用無綫器材，或者自行購買器材，預算以千萬元計。港台就梗係想買入或租用器材啦，起碼省時省力，但買唔買得切，人哋租唔租畀你，又係另一回事。
新大樓計劃捲土重來
另一樣更重要嘅，就係港台計劃興建嘅將軍澳新大樓將捲土重來。去年一月，立法會工務小組委員會否決港台新大樓撥款，當時議員表明要新大樓造價「減磅」先可以再考慮。據聞，港台仲未諗到刪減邊個部門，其中有考慮過新聞部可以放喺市區，或將舊片庫放喺其他地方。不過，一日未決定，一日建築署都仲未可以重畫圖則，所以內部預計最快都要今年底先搞得掂。