中環出更：債務危機襲全球 名人希望傾掂數
希臘拒絕向國際貨幣基金組織（國基會）償還十五億歐元貸款，令全球金融市場震盪，日前港股一度「股災式」暴跌逾千點，唔少股民腳軟。卓妮尋日喺沙田馬場見到一班政商界名人，佢哋都好關注事態發展。馬會大董、創興銀行副主席兼董事總經理梁高美懿（Margaret）大派定心丸，佢話唔擔心港股會再受影響，事關港股依家受內地因素影響較多喎！
不過Margaret都希望希臘最後可以同國基會傾掂數，唔使退出歐元區。
佢又話，歐洲現時唔少金融機構都急住脫手希臘相關債券以避險，幸好創興銀行無持有相關債券，所以無乜影響。
講到現時希臘唔少別墅豪宅都以「跳樓價」拋售，Margaret就話冇乜興趣買，皆因當地失業率高達百分之二十幾至三十，即使搵工同生活亦都唔容易。Margaret笑住話，去旅遊玩吓就冇乜所謂，但係長住就唔好搞喇！
香港青年聯會常務副主席吳傑莊就有唔同睇法，佢話自去年歐元持續下跌以來，希臘嘅投資移民門檻相對低咗，只要喺當地投資或買樓超過二十五萬歐元即可。佢有唔少朋友已經喺當地購入好多物業，佢都覺得諗得過。
「鍾」極睇好港股
立法會紡織及製衣界議員鍾國斌亦係樂觀派，佢話今次希臘負債銀碼唔算大，之前冰島亦曾試過破產，相信國際貨幣基金組織只係擔心放任希臘拖延債務會有骨牌效應。港股日前大跌已經反映咗債務危機，依家入貨入得過喎！講就咁講，股民入市都要小心就真。
卓妮