延誤當食生菜 國泰真係失敗

唔知係咪衰開有條路，國泰近排頭頭碰着黑，負面新聞爆完一單又一單。尋日之嘛，國泰一班飛往東京成田機場嘅航班原定朝早九點三出發，準備起飛之際，機長突然宣布要重新檢查機件，初頭話十點半飛得，點知拖吓拖吓，卒之拖到下晝兩點幾，足足延遲咗五粒鐘，乘客大失預算，怨聲載道，紛紛鬧爆國泰服務唔得掂。

又難怪乘客咁勞嘈嘅。五粒鐘喎，香港飛去日本都夠喇，簡直離晒大譜！姑且聽吓國泰點解畫。佢哋話喎，涉事航班起飛前發現制動器有問題，要進一步檢查，由於安排另一架航班接載乘客需時，新舊登機閘口相距好遠，加上準備飛機餐需時，所以搞到咁遲喎。

呢啲咪叫賴地硬囉，就算要搵藉口都搵個似樣啲喇。再講吖，一次就話意外啫，接二連三發生，條數又點計先？有受影響乘客反映，近期三次搭國泰機，三次都延誤，夾夾埋埋遲咗八個鐘，怒斥國泰「delay（延誤）當食生菜」。其實呢位乘客算客氣嘅嘞，換着個火爆啲嘅，delay就delay嘞，不過可能係唔出得街嘅粗口咁解啫。話時話，港鐵誤點都有罰則啦，國泰航班延誤唔係就咁算呀？唔該民航處處長羅崇文捲鋪蓋前睇緊啲，咪淨係掛住打造私人羅馬浴池至得o架！

講真，國泰烏煙瘴氣，亂七八糟，航班延誤只係小兒科咋。早排有航機爭啲上演「機尾亂流」嘅九霄驚魂，嚇到乘客鼻哥窿都冇肉。咁都未算，佢哋客機提供嘅食水被驗出細菌超標，其中包括喺動物糞便搵到嘅大腸菌群，冇飲壞人算好彩。國泰醜聞天天不同，鑊鑊新鮮，冇人可以保證唔會再發生大鑊嘢o架。

其實諗落都幾唏噓，曾幾何時，國泰享譽國際，多次奪取全球最佳航空公司桂冠，港人提起都面上有光，可惜近年因為管理不善，服務不斷插水，商譽一落千丈，最終搞到連一哥寶座都要拱手讓人。冇計喇，國泰並不「泰」平，勞資糾紛不斷，唔係罷工就係工業行動，員工離心離德咯喎，服務有咩法子唔插水吖。

所以話，有啲嘢真係唔到你唔信。地震等重大天災之前，例必有大量蛇蟲鼠蟻蒲頭，國泰大事小事不斷，斷估未來都唔慌有運行。正如今日香港，紛紛擾擾，七國咁亂，牛鬼蛇神橫行霸道，國泰嘅沉淪，只不過係成個社會嘅縮影咋。