政情：育才還須滋身硬
浸會大學校長陳新滋嘅任期今日屆滿，然後交棒畀九月履新嘅繼任人錢大康。陳新滋尋日最後一次以校長身份見傳媒，分享由佢細細個游水偷渡嚟香港讀書，到上任浸大校長嘅經歷。陳新滋為自己做校長嘅表現打六十分，任內最遺憾嘅係未能發展中醫教學醫院項目。對於上年拒絕向撐黃傘學生頒發畢業證書一事仍然企硬，仲話畀佢再做多次，佢都會咁做喎！唔知陳新滋臨別都企得咁硬，係咪暗示被視為開明派、傾向同情學生嘅錢大康，上任後唔好太縱容學生呢？
爭地建中醫院不成留憾
陳新滋話，佢細個因為文化大革命冇書讀，連向朋友買嘅書睇完都要即刻「焚書」，為咗讀書仲游水偷渡嚟香港，真係得來不易。可能佢捱過辛苦，所以好堅持自己原則。例如兩年前嘅李惠利地皮爭議，陳新滋承認自己唔夠「牙力」，未能成功爭取起中醫院，係任內一大遺憾。但佢仍然企硬堅持塊地不適合起豪宅，校方有責任提出反對，唔能夠為咗同政府保持和諧就投降。
陳新滋講到明，唔會曲意奉迎政府，亦唔會太遷就學生。好似上年畢業禮，佢拒絕向撐黃傘學生頒發畢業證書，作風夠晒強硬。佢話畢業禮喺莊嚴場合，學生應有所節制，作為校長不能妥協。講講吓，佢又提到早前舉行新校長諮詢會時，浸大學生會衝擊校董會休息室事件，佢希望學生表達意見時亦應遵守校規。
批反水客示威者似無賴
至於愈嚟愈激進嘅本土文化興起，陳新滋批評部分反水客示威者嘅行為似無賴，文明社會唔應該有排外心態，而港獨亦不可行。總之無論講起乜嘢具爭議性嘅話題，陳新滋都係挺直腰骨，拒不妥協。相比錢大康喺學生衝擊新校長諮詢會後，應承加開諮詢會嘅做法，陳新滋確係夠薑。唔知佢會唔會過番幾招畀錢大康，等佢唔好咁易畀學生恰呢？
陳新滋獲浸大頒授為榮休校長，聽日起生效。退休後，陳新滋聲稱會專注研究，不會擔任政府公職。