中環出更：疑遭竊聽 曾鈺成當趣事
自從近日建制派WhatsApp群組訊息洩漏，揭露立法會主席曾鈺成喺政改表決期間參與甚深，搞到政界唔少人都鬼影幢幢。尋日曾鈺成再被爆三年前考慮參與特首時，佢位於立法會大樓一樓嘅主席辦公室及六樓議員辦公室，疑被裝有竊聽器。不過曾鈺成回應時話，當呢件事係趣事，唔覺得有實際威脅，仲話如果當時報警，警方都唔會睬佢咁話。
報道話，當年曾鈺成助理買咗個防竊聽裝置，檢查過兩個辦公室後好似有反應，又話有架車喺佢屋企樓下監視佢喎。曾鈺成就話，當時只係測試六樓辦公室，當時儀器有反應，但之後再試又冇反應。講到部機神神哋，究竟係真定假呢？但佢強調，有議員對件事提出關注，所以秘書處會考慮係咪採取措施處理。
開會不再參與建制WhatsApp討論
另外，曾鈺成回覆泛民對佢喺政改期間用WhatsApp同建制派溝通一事嘅質疑，佢話當日通報泛民事後行動「純粹為了避免誤會」，絕對冇破壞泛民行動之意，又話將來唔會喺會議期間參與建制派群組討論，即係唔會退出囉。
卓妮