中環出更：抱孫女獻唱 善款「聰」住嚟
股市急跌加上零售業吹淡風，但無損商界為善團籌款熱情。幫助內地貧困農戶自力更生嘅國際小母牛香港分會日前舉行慈善晚宴，多位名人及高官爭住展歌喉籌款。小母牛副主席葉澍堃一曲值萬金，聲沙沙落力獻唱，話咁易進帳四十萬元。小母牛籌委會副主席王庭聰都唔執輸，抱埋可愛孫女唱閩南語名曲《愛拚才會贏》，數十萬元善款滾滾來。
將捐細女出閣百萬禮金
唱得興起，王庭聰更加碼，拍心口預告將細女王麗盈今年底結婚嘅一百萬元賀禮捐予小母牛。咦？仲未擺酒就知道有一百萬禮金收？王庭聰笑言就算收唔到咁多，佢都會包底照捐喎！
股市近排急跌，唔少人荷包縮水，未知有否影響籌款成績？籌委會主席杜振源（Simon）就話，市道暢旺也好，淡靜都好，要揼人心口籌款從來唔易，一切要靠平日累積人際網絡，人家先會畀面你。睇嚟Simon做小母牛籌委會主席多年，真係多得佢不停碌人情卡，先有源源不絕嘅善款喇！當晚就合共籌得七百聰萬元。
講起做生意，最近韓國新沙士疫情令好多商家頭痛。做文具生意嘅Simon都關注疫情最新發展，佢坦言韓國買家靜晒，查詢報價嘅電郵減少兩、三成，只好靜待疫情退去。有代理韓國化妝品嘅莎莎國際主席郭少明就話，雖然去韓國風險大，但係佢哋仍有派同事去首爾傾生意，惟有提醒同事戴口罩，注意個人衞生。
卓妮