俗語話，一分耕耘，一分收穫。打工仔最怕有汗出冇糧出，而香港郵政嘅員工啱啱相反，集體蛇王不特止，仲要呃超時補水，簡直係打工皇帝，你話納稅人點諗呢？正如「東方報業民意調查」顯示，受訪市民普遍認為香港郵政經營不善，醜聞不斷，非徹底整頓不可。
講多無謂，食多會滯，睇數字最實際。香港郵政管理混亂，經營不善，搞到生意萎縮，年年見紅，淨係上個財政年度已經虧蝕過億元。正常嚟講，生意不景，工作量減少，應該裁減人手至係，點知香港郵政一於少理，員工總數一直維持不變，結果養懶蛇不特止，每年仲要發放二億元超時津貼，你話係咪離譜吖。
呢，日前本報踢爆二十幾名郵政員工集體蛇王，然後呈報超時工作，而管理層居然照批津貼，引起社會嘩然。「東方報業民意調查」發現，三成八受訪者批評香港郵政監管不力；三成人認為騙取及濫發津貼嚴重；兩成人擔心問題只係冰山一角。對於郵件數量下跌，超時補水依然居高不下，部分員工補水等於半份人工咁滯，四成四人認為審批無王管，變相縱容；三成二人要求審計署介入調查。
老實講吖，如果私人企業生意欠佳，仲要養埋咁多冗員，一早關門大吉喇。更離譜嘅係，香港郵政唔止年年見紅，而且頻頻「失信於民」，淨係舊年就遺失本地及海外郵件七千三百幾件，賠償金額超過二百萬元，甚至試過八日內三次遺失郵袋，簡直匪夷所思。
所以話，濫發超時補水唔見一筆，遺失郵件又賠一筆，多多公帑都唔夠嘥喇。對於香港郵政一直指人手緊張，增加營運壓力，乘機縮短服務時間，四成半受訪者直斥管理混亂；兩成七人認為必須整頓人手。
其實，整頓人手只能治標不能治本，香港郵政管理混亂，積重難返，直情好似病入膏肓咁，醫番都嘥藥費。審計署多年前已發表報告批評郵政經營不善，點知管理層一直當耳邊風，咁多年來情況唔止冇改善，反而持續惡化，證明郵政官僚冥頑不靈。唔怪得三成四受訪者認為郵政浪費公帑；三成一人直指混帳多籮籮；兩成六人認為郵政改革只係做騷。
冇錯嘞，要求郵政官僚自己改革，等於與虎謀皮，對付呢啲不務正業、添煩添亂嘅衙門，唯一嘅辦法就係進行改頭換面嘅大手術，咁至可以重新做人吖。咪話功夫茶唔提醒，當斷不斷，必受其亂，港府施政混亂，民望已經夠低嘅喇，再畀郵政官僚佗衰家，盞衰多幾錢重嘅咋！