政情：馬時亨女婿 幫梁卓偉「尋人」
商務及經濟發展局前局長馬時亨女兒馬露明（Christine）創辦嘅品德教育中心，尋日舉辦畢業禮暨慈善嘉年華，香港大學醫學院院長梁卓偉亦有出席，原來佢係Christine丈夫劉仲恒（Kevin）當年讀醫科時嘅老師，Kevin知道梁卓偉搵人心切，笑言要幫手發掘有潛質將來讀醫科嘅人才喎！
馬露明為兔唇患者籌款
Kevin話，梁卓偉係一個好好嘅老師，所以要介紹多啲人畀佢做學生。品德教育中心目前與某知名中學合作推行品德教育，發現當中唔少學生都有興趣讀醫科喎。
講番畢業禮，Christine帶領小朋友合力度橋設計攤位、遊戲及義賣紀念品，為兔唇裂顎患者籌款做手術。Christine話，每年佢哋會幫唔同機構籌款，往年幫過盲人及弱能人士，今年受益對象係兔唇患者，因為咁樣小朋友會比較容易理解。