建制派WhatsApp群組外洩事件，令政界風聲鶴唳，好多政界人士都怕手機秘密資料外洩，或在立法會玩手機時被影到。教育局局長吳克儉（吳得掂）就經常被人影到喺立法會期間分心，有次仲被揭發睇緊股票，唔知佢有咩心得避免再衰多次呢？
吳得掂聲稱平時喺議會內玩手機，都係睇實用性資訊為多，如果有娛樂資訊通常會返屋企至睇。
經過今次WhatsApp洩密事件後，佢都唔打算清除WhatsApp內容，因為平時都靠WhatsApp同其他同事溝通，至於機密資料就面對面交代，唔會用電話。
食物及衞生局局長高永文就話，平時好少透過WhatsApp傳送機密資料，所以唔太擔心對話資料外洩。不過佢會同政府嘅科技同事研究一下，到底係咪定期清除機內嘅資料，免除後患喎。