政情：同聲同氣 廢鑊又捱插
美國最高法院上周歷史性通過全國同性婚姻合法化，好多支持平權嘅人都欣喜若狂。平等機會委員會主席周一嶽（廢鑊）第一時間跳出嚟話，香港社會唔可以避免同性婚姻呢個問題，希望社會就呢個議題有更多討論。點知話音甫落即惹來內外夾擊。前平機會主席林煥光話，同性婚姻呢個議題要時間慢慢醞釀，唔能夠勉強。平機會委員周浩鼎（Holden）都插佢話，廢鑊咁高調發表言論，憂慮外界以為平機會支持同性婚姻合法化，咁就好大件事喇。無論外人同自己人都覺得廢鑊咁講係有問題，睇嚟佢今次真係要唔反省吓，作為平機會主席係咪行得太前。
口快快激起多方不滿
Holden明言多年嚟對同性戀有一定保留，特別好反對同性婚姻合法化，佢好擔心同性婚姻一旦合法化，會嚴重破壞中國人嘅婚姻制度同家庭倫理核心價值，認為呢啲問題唔係靠兩個成年人領養兒童就解決到。Holden話，喺同性議題上，大家有唔同諗法係好自然，而平機會內部都不時作出討論，但唔認為平機會應該咁快表態。
但廢鑊有理無理講咗先，話除咗美國外，新西蘭、法國及愛爾蘭等十幾個國家，均相繼通過同性戀婚姻合法化，希望社會各界可以就同性婚姻多啲討論，平機會亦會參與有關討論。就係呢幾句激起好多人不滿，唔止Holden呢啲平機會中人有微言，連林煥光都暗寸廢鑊。
身兼行政會議召集人嘅林煥光話，對同性婚姻喺香港立法一事有保留，始終「美國還美國」，認為呢啲事要取得較大共識先有機會推行，唔可以急。睇嚟廢鑊呢次又衰多一鑊。
曾高調撐遊行惹質疑
其實，廢鑊都唔係第一次咁快跳出嚟興風作浪，去年同志團體搞遊行，佢高調現身撐場，即惹來唔少保守派批評，覺得佢立場傾斜向同志團體，唔夠中立。有人更加質疑話，如果反同性戀團體搞遊行，廢鑊係咪都應該撐場先？