中環出更：黃國健反擊：食花生笑得幾耐
建制派最近因為政改投票「甩轆」及WhatsApp群組訊息外洩，慘被全城嘲笑。盛傳參與新界東補選嘅公民黨新東支部主席楊岳橋（Alvin）尋日出席論壇時趁機挑撥話，WhatsApp訊息外洩唔係「技術性失誤」，中央實唔會容忍嘅。同場嘅工聯會立法會議員黃國健（KK）就話，離場冇投票只係鬧劇，一時技術性失誤，仲話呢排啲人食飽花生後，又笑得幾耐？邊個笑到最後到時先知喎！
至於洩露訊息，KK話係個人道德行為，同建制派無關，無證無據就無謂點名。佢又話訊息內容冇政治機密，建制派都係人，有情緒就會宣洩喎！
田二少鞠躬 KK跟住做
因「甩轆」事件日日針鋒相對嘅新民黨議員田北辰（田二少）同胞兄自由黨田北俊，繼續爆舌戰。田二少話，近期都有同哥哥食飯飲酒，仲話與其將感受放喺心內，不如講晒出嚟，相信有利團結。但係話口未完，田二少喺電視訪問中繼續數落哥哥至今仍唔道歉係面子問題，仲話知恥近乎勇喎。
講講吓，田二少主動起身鞠躬道歉，有人即問KK會否都鞠躬，KK即起身照做，仲話鞠多個躬有乜問題喎！
卓妮