忤逆仔邊度都有，最忤逆嘅係邊個？咪就係港府囉！安老政策天殘地缺，全民退保一拖再拖，搞到好多長者臨老唔過得世吖。呢，大埔院舍虐老事件發生冇幾耐，又有婆婆七老八十仲要靠執棄置生果同紙皮維生，簡直係國際都會嘅恥辱。
話說油麻地果欄舊年底開始，有唔少老人家喺對面天橋底垃圾山「淘寳」，專執果商棄置嘅爛生果。當中有對「耆英拾荒姊妹」，已經年過七旬，其中一位曾罹患癌症添。兩位婆婆分工合作，一個負責用最原始嘅「私家車」將爛生果推到攤檔，將較「四正」嘅揀出嚟，另一個負責睇檔，將水果廉價出售，吸引唔少貪平嘅街坊幫襯。
兩位婆婆好勤力o架，由天光開工做到下晝六點，每日做足十幾個鐘，扣除皮費剩番一二百蚊。好彩畀佢哋擺檔嘅店主好心，唔收租金，唔係嘅話分分鐘搵埋雞碎咁多唔夠開飯。最慘就係，如果撞着食環署巡查，咁就冇人情講咯，每次罰款千幾蚊，等於半個月白做，好肉赤o架。
咁大年紀點解唔享清福，仲要捱世界？兩位婆婆係咁講嘅，話情願自己辛苦啲，使費慳啲，都唔想向政府申請綜援。即係咁，自食其力，唔肯靠政府養，婆婆真係冇得頂，甚至有人會話，喺佢哋嘅身上，睇到咩叫獅子山精神。之不過，風燭殘年仲日日捱騾仔，點都講唔通喇。香港唔係落後地區，而係富裕社會，政府窮得只剩下錢，今年公務員仲額外加薪添，更加冇理由坐視貧窮長者無依無靠，自生自滅。學似長者權益組織負責人話齋，呢件事絕對反映政府對長者晚年工作研究唔夠深入，長者要靠拾荒維生係富裕社會嘅恥辱。佢敦促當局反思現行安老政策，還長者有尊嚴嘅晚年。
其實講嚟講去，長者貧窮問題不斷惡化，完全係港府一手造成。歷屆港府都強調老有所養，老有所依，實際上係將長者當成財政負擔，推得就推，不少長者被迫靠執紙皮賣錢維生，白髮蒼蒼仲要揸小巴搵食更可能係全世界絕無僅有嘅奇觀。大家一定仲記得，早排有位七十三歲長者為咗生活，以假身份證報細十一歲謀得一份保安工作，結果被判入獄，年逾古稀自食其力，竟然換來牢獄之災，都咪話唔淒涼吖。
講到尾，如果有完善嘅退休保障制度，公公婆婆根本就唔使為咗兩餐搵條命去博！弊在港府涼薄縮骨，唔肯承擔，全民退休保障計劃討論咗十幾年，到依家仲係只聞樓梯響，你話班冷血港產官僚係咪忤逆吖！