政情：新東補選強勢撼民記
鄉事派同民建聯（民記）近年水火不容，喺各場選舉爭崩頭，適逢今次政改方案「甩轆」，建制派為卸膊將鄉議局主席劉皇發（發叔）擺上枱，明明係「班長」嘅民建聯葉國謙責任最大，但依家成班人就賴要「等埋發叔」。鄉議局尋日罕有高調開大喇叭，聲言要推舉上水鄉事委員會主席侯志強參加因為湯家驊辭職而引發嘅新界東補選，莫非因為新仇舊恨而要向民記報復？
謀叫建制幫鄉事抬次轎
新界東議席係兵家必爭之地，建制派方面，係人都知如果民記要派人出戰嘅話，唔係陳勇就係劉國勳，兩個都係北區區議員。不過，兩人同時都係民記嘅人，即係鄉議局死敵，搞到今日鄉議局開執委會，多個鄉紳都推舉侯志強參選，話「佢唔入地獄，邊個入地獄」，仲叫「阿強，上！」又話行軍遣將，最緊要係時機喎，仲嗌副主席張學明做中間人，叫民記等建制派幫鄉事派抬番一次轎。
侯志強就話，衷心多謝各位支持，希望凝聚新界人力量，唔好成日幫人抬轎咁冇出息，無論邊個出選都會全力以赴。講完全場拍手，真係唔講仲以為佢已經當選咗！
啱啱「登基」嘅鄉議局主席劉業強都話，如果鄉議局派人參選都係好事，又話喺依家嘅政治環境下，議會議席主宰一切，如果鄉事派喺未來一屆立法會攞唔到任何議席，會令整個新界鄉事組織陷入被動嘅處境，呼籲各人為選舉做好準備。不過，參加補選單嘢仲要交畀相關委員會處理，究竟係咪派人參選，就未作最後拍板嘅。
睇番一二年立法會新界東直選，打住鄉事旗號出選嘅經濟動力，都只係得五千七百一十七票，雖然未計侯志強幫自由黨抬轎嗰批鐵票，但就算加埋都未必能贏到補選，仲會分薄建制派票源添，去到最後係咪又會被有關方面勸退，實在好難講。
「發仔」否認父辭立會議席
另外，近日發叔不斷被傳患咗重病，所以冇就政改方案投票，甚至話佢會辭去立法會議席。劉業強就話冇呢件事，澄清發叔之前有少少感冒，有段時間去過醫院做身體檢查，但依家身體已經好轉緊；又話雖發生「甩轆」事件，但爸爸身經百戰，依家睇落心情已冇受影響，雖然少出嚟，但係日日都有朋友探佢喎！