中環出更：獲贈大農地 仁人皆歡喜
仁濟醫院顧問局早前舉行周年大會，選出王氏國際主席王忠秣（Ben）擔任顧問局主席，接替已做咗十二年主席嘅唐尤淑圻，下月起生效。咁開心嘅時刻，一班顧問局及董事局成員齊齊食晚飯慶祝，席間眾人情緒好高漲，細問之下，原來某大地產商打算向仁濟捐贈位於新界八鄉嘅二萬呎農地，現時雙方仍就細節進行磋商，難怪當晚個個開心笑晒喇！
記得前年博愛醫院獲恒基地產捐出價值逾億嘅農地，用於興建全亞洲最大嘅護理安老院，估唔到仁濟醫院主席林煒珊（Vanessa）腳頭咁好，亦獲地產商伸出援手。Vanessa謙稱唔係自己嘅功勞，查實係幾代仁濟成員努力嘅成果，顯示仁濟愈來愈受社會肯定。
擬建安老院或青年宿舍
突然有塊靚地「從天而降」，用嚟做咩好呢？仁濟醫院行政總裁黃偉健就話，如果捐地計劃成事，可以用來興建護理安老院或青年宿舍，但最終都要睇吓政府點樣審批改變土地用途。
當晚到場嘅好多都係一家人，例如做過仁濟醫院主席嘅Vanessa父親林建名、阿Ben嘅兒子仁濟醫院副主席王賢訊、副主席嚴徐玉珊及丈夫前主席嚴玉麟，仲有「針織大王」羅定邦女兒羅嘉穗及弟婦堡獅龍執董錢曼娟，名副其實係「積善之家」。羅嘉穗話，家族旗下嘅宏施慈善基金繼上月喺深水埗開設社區中心，為新來港家庭提供支援後，快將喺葵涌開多一間，事關社會有好大需求，早做好過遲做喎！
卓妮