香港郵政點解年年虧蝕？好多人可能會答，生意唔好啩。咁就有所不知喇，生意唔好仲係其次，管理混亂至係主要原因，每年淨係員工嘅超時津貼就多達兩億元，有乜法子唔虧蝕吖。
本報近日踢爆香港郵政連串醜聞，先有濫發兩億元超時津貼，後有二十幾名郵差被揭集體蛇王並騙取超時補水，引起一片嘩然，有網民直指事件涉及刑事罪行，要求執法機構調查，而審計署亦表示關注，隨時介入審查。
冇錯嘞，香港郵政烏煙瘴氣，混帳多籮籮，審計署想唔出手都唔得喇。好簡單，家陣寄信嘅人愈來愈少，香港郵政生意淡薄，但向員工發放嘅超時津貼仍然居高不下，你話究竟點解呢？
本報記者追蹤之下發現，長沙灣五支特快專遞收派小隊嘅六部車輛，幾乎每日下午三時起就不約而同出現喺荔枝角工業區嘅偏僻街道，身穿制服嘅郵差公然喺車上瞓覺、玩手機，甚至到附近工廈歎茶、吸煙。有郵車逗留長達三小時，有啲到晚上八時至收工。據香港郵政嘅紀錄，二十幾名涉嫌蛇王嘅員工，三日內呈報逾時工作八十幾個小時，郵政話正調查有冇騙取超時補水喎。
其實，唔使調查都知道當中有蠱惑喇。正常嚟講，生意唔好，工作量減少，人手應該下調至係，但香港郵政員工總數一直維持七千人，當中非公務員約二千人，結果唔止人多好蛇王，而且變相縱容員工濫申超時津貼。有郵務人員爆料，香港郵政對員工申領超時津貼完全無王管，員工申領理由花樣百出，有人涉嫌誇大所需處理嘅郵件數目，有人上班時間詐病、落班後突然「康復」可處理積壓郵件，最終申領嘅超時津貼居然全數獲批。其中機場空郵中心及九龍灣中央郵件中心成為申領超時津貼嘅「重災區」，唔少人每月超時津貼逾萬元，等於半份人工咁滯。
嗱，呢啲咪就係香港郵政年年虧蝕嘅真正原因囉。喺咁多政府部門之中，郵政幾乎每年都係超時津貼開支最多嘅部門，如果話當中冇蠱惑，你信唔信吖？話時話，郵政員工呃超時津貼早就唔係新聞，○八年沙田中央郵政局被揭發至少二十名郵差涉嫌串通合約員工「篤數」，報大派信量呃超時津貼，郵政發現後並無即時報警，經傳媒揭發後至話會內部調查，卒之不了了之。
所以話，物必先腐而後蟲生。審計署一○年曾發表報告揭露香港郵政經營不善，點知依家唔單止冇改善，反而更加惡化，證明內部已經爛透，醫番都嘥藥費。正如有人質疑，香港郵政頻頻被揭發浪費公帑，點解署長毋須被問責呢？