政情：八網難逃：「區」議員落葉也關注

落葉歸根本來就係大自然循環定律，但西貢區議員區能發為咗居民安全，違反自然定律都要成功爭取阻止樹皮、枯葉跌落地，唔通佢都相信人定勝天？有網民日前發現佢嘅橫額關注大片枯葉、樹皮跌下危及途人，要求當局加強巡視，引起網民恥笑會唔會係「樹根」出咗問題？區能發認真解釋，話區內種咗唔少棕櫚樹、假檳榔，一塊樹葉砸落嚟閒閒哋都八磅、十磅，真係會對居民構成危險；而事後康文署亦有搵人修剪樹葉，名副其實成功爭取。樹葉都要你管，會唔會有啲小題大造呢？區能發笑言區議員就係做呢啲，唔通日日講政制咩！