政情：推$1促銷 「釗」開心
篤信佛理嘅香港中華總商會（中總）會長楊釗，向來鍾意行善，日前趁中總成立一百一十五周年，同一千五百家商戶合作推出多個「一蚊」促銷。楊釗話，要開心，最緊要係懂得「三樂」，就係「知足常樂」、「助人為樂」、「自得其樂」，以優惠價買到心頭好，就係自得其樂嘅好方法喎。
旨在令社會多正能量
一連九日嘅全城消費活動，由本月二十五日起開始，逾千間商舖參與，包括各大連鎖飲食及零售商。唔少筍貨以一蚊低價出售，好似「一蚊一個羅漢果」、「一蚊一兩花旗參」等，部分優惠更低至三折。通街有平貨執，莫非要為否決政改方案沖喜吓？楊釗就話，同各大商戶聯手推優惠，旨在令社會增加多啲正能量。睇見人人享受到購物樂趣，佢都開心埋一份。