政情：財會主席交波 建制唔益人
政府日前宣布押後創新及科技局撥款申請議程，要求立法會財務委員會優先審議十一項民生項目，有望休會前所有紓困措施撥款可以一筆清。財委會主席張宇人（Tommy）眼見唔使「拉布」亦樂意配合，安排暑假前最後三次財會都加開一節，至每次會議開足六小時。不過，講起下個立法年度邊個接手財委會主席，Tommy率先表明無意連任。不過，我哋聽聞建制派寧願交畀財委會副主席陳健波接手，都要踢走Tommy至真。
張話全心做生意算數
Tommy話，「更表」協調咗佢同吳亮星（星爺）梅花間竹咁做兩年，佢應承主持第一、三嘅立法年度財委會就係咁多。佢又自言年紀大，每個星期困坐立法會咁耐，文件又大疊疊咁厚，單係過去一個年度嘅財委會會議已經係歷年最多，為咗做好主席呢個位已經丟低咗生意冇理，所以決定準時退位交棒。雖然財委會主席呢個位自星爺主持新界東北發展撥款一役後成為燙手山芋，唔係人人願意接手，但據知建制派早已屬意陳健波接棒。
我哋問過陳健波，佢先猛呻財委會主席係辛苦工，一定唔會主動爭取去做，但轉個頭又話假如建制派提名佢，佢會義不容辭，只可以話佢認真忠肝義膽喇。不過，有政界耳語話，其實Tommy想下個立法年度「多坐一會」，豈料消息見報後，有建制派中人暗寸話，就算星爺唔啱做主席，建制派都大把人可以接手，擺明唔想益Tommy。唔知係咪咁，Tommy先知難而退，提早打開口牌話唔做，疊埋心水做生意算數。
「班長」葉國謙或「四失」
不過，自從建制派上周政改表決甩轆後，葉國謙、林健鋒等人需要被「祭旗」問責，好似一直被視為建制派陣營「班長」嘅阿謙，即將面臨同時「四失」，包括可能接替黨友李慧琼嘅行政會議議席、立法會「班長」及議席、區議會議席。建制派有咁多個重要位置要填窿，佢哋搵唔搵到神一般嘅隊友出任要職，相信會係一大難題，但依家唔夠人下仲咁氣燄囂張，難怪表決大甩轆被一沉百踩，唔抵可憐。