中環出更：白鴿唔補選 霸道「勸退」成智
湯家驊前日宣布退出公民黨及辭任立法會議員一職，引發新界東議席補選，最快約於本年底至明年初進行補選。因為力撐政改「袋住先」而面臨被逐出民主黨（白鴿黨）嘅黃成智，尋日表示有意參與新界東補選，但黨友單仲偕就話，該黨唔會派人參選，仲話會勸退成智喎！成智都就嚟被逐出黨，單仲偕仲好意思叫人唔好選，白鴿黨以為自己玩晒？
對於成智表示有意參加補選，有消息指白鴿黨不會對成智提供任何協助，而今次成智嘅做法與黨立場亦有不同。單仲偕就話，佢可以做一啲勸誡，但當成智被逐出黨之後，佢哋就好難對佢施加限制，事關到時成智做嘅事與黨已經冇任何關係，佢哋都冇咩可以做到喎。
李偲嫣：獲大批支持者籲參選
此外，正義聯盟召集人李偲嫣積極考慮出戰新界東補選，更對派人出戰年底區議會選舉不置可否。李偲嫣承認，獲大批支持者呼籲她參選，「過去二十四小時接電話接到癲咗」，加上對建制派上星期在政改方案表決時搞出「大頭佛」感到失望，認為「（議席）唔係建制食晒o架嘛？」
卓妮