港人成日笑內地人唔文明，其實係五十步笑百步咋！唔信嘅，睇吓海洋垃圾問題就知嘞，香港每年有一萬五千噸海上垃圾，逾八成源自陸上，其中九成半來自本地，證明唔少港人欠缺公德心，加上港府搞環保得把口，令問題不斷惡化。
呢嗱嗱嗱，有環保團體投訴深灣避風塘嘅鴨脷排長期被海洋垃圾包圍，就係證據嘞。本報記者實地視察，唔睇猶自可，一睇嚇死人，上址海面漂浮大量膠袋及膠樽，島上沙面大部分被垃圾掩蓋，原來美麗嘅海岸線消失得無影無蹤。由於成個島被垃圾圍住同覆蓋，同垃圾崗冇乜分別嘅咋。
咪以為海洋垃圾堆積如山，淨係有礙觀瞻咁簡單，仲會造成生態大災難。聽吓專家點講吖，垃圾覆蓋海洋，會令海面沼氣難以釋放，唔止魚類誤食垃圾後會因為難以消化而死亡，仲會令海藻無法吸收陽光而枯萎，海洋生物缺乏食物，最終會集體死亡。
咁仲唔止，垃圾沖上沙灘亦會令水上活動嘅危險大增，威脅市民安全。好似另一黑點屯門龍鼓灘咁吖，本來係水上運動極佳場地，點知因為灘上布滿膠樽及玻璃碎片，搞到運動員一步一驚心，稍有行差踏錯，隨時流血收場。
話時話，海洋垃圾問題存在已久，早前石澳鶴咀「垃圾灣」先至被揭發堆滿一百八十五噸垃圾。係人都知，鶴咀係本港唯一海岸保護區，當局咁都視若無睹，闊佬懶理，係咪真心搞環保，唔使畫公仔畫出腸嘞。正如有人話齋，政府部門各自為政，互相推卸，例如海上垃圾歸海事處管理，岸上垃圾由食環署負責，公眾泳灘係康文署管轄，郊野範圍又變咗漁護署管理，大家你推我讓，個波拋嚟拋去，結果關人個關，邊有人做嘢吖。
講番鴨脷排嘅問題吖，灘上垃圾原來歸食環署負責，點知署方藉口多多，唔係賴地點偏遠，就係賴天氣及技術上有困難，垃圾問題一直未解決。環保團體睇唔過眼，日前召集義工執垃圾，短短三小時就收集到四十袋共二百公斤嘅垃圾，都咪話唔誇張。不過講起就慚愧嘞，據講大部分義工都係外籍人士，本地人只有十幾個，再次證明港人所謂熱心環保得個樣嘅咋。
冇計喇，上樑不正下樑歪，港府自己搞環保都係葉公好龍，市民點會唔有樣學樣喎。講到底，保護環境，人人有責。家陣港府充斥垃圾官僚，胡混度日，部分市民又冇乜公德心，唔好話美麗海岸線變晒垃圾崗，遲早成個香港變成垃圾港都有之，到時連擴建堆填區都可以慳番咯。