政情：公民講場：速繳還巨額訟費何梁好富貴

民主黨何俊仁（AV仁）同社民連梁國雄（長毛）兩個立法會議員，曾就一二年特首選舉結果提出司法覆核，前年被終審法院裁定敗訴，需要支付二百多萬元訟費。有報道話兩人已迅速繳付其中大部分訟費，質疑佢哋未有向立法會申報巨額款項來源。屯門區議員陳雲生尋日去信廉政公署，促請徹查經濟狀況欠佳嘅長毛錢從何來。AV仁回應話用自己積蓄支付訟費，長毛就話仲拗緊訟費，談唔上畀咗喎。究竟畀咗定未畀呢？錢又從何而來呢？真係唔清唔楚。